Вы павінны разумець, што спонсараў штодня закідваюць заяўкамі. У адной з краін УП грантавы фонд штодня атрымлівае 20 заявак (нават калі няма заяўленага конкурсу). Уяўляеце, на якім рынку вы працуеце?

Найлепшае выйсце – пазнаёміцца са спонсарам асабіста. Для гэтага трэба будзе час і некалькі сустрэч, таму не чакайце неадкладнага паступлення фінансаў з першага ж дня. Часам працэс пабудовы адносін даецца нялёгка. Не існуе адзінага рэцэпту, як гэта зрабіць, але трохі настойлівасці, крэатыўнасці і ўдачы вам не перашкодзяць.

Тым не менш, я дам некалькі саветаў, якія дапамогуць вам прабіцца.

Для ажыццяўлення ўсіх прыведзеных ніжэй ідэй, у прыватнасці, для арганізацыі вашых сустрэч, паспрабуйце прыцягнуць пасярэднікаў з краіны, у якой вы хочаце працаваць. У іх павінны быць сувязі з прадпрыемствамі, якія цікавяць вас.  Знаёмствы вырашаюць многае.

Возьмем, напрыклад, спробу атрымаць сродкі ад міжнароднага спонсара з іншай краіны.

Папярэдняе падарожжа ў краіну з мэтай знаёмства – гэта прамы шлях да сустрэчы са спонсарам, але многія фонды і буйныя спонсары не вітаюць гэтага па вышэйпаказаных прычынах. На гэту першую непасрэдную азнаямленчую сустрэчу лепш за ўсё пайсці дырэктару, заснавальніку, старшыні або яго намесніку.

Альтэрнатыўным варыянтам можа быць правядзенне круглага стала або мерапрыемства ў краіне ажыццяўлення вашага праекта. За арганізацыю падобнага мерапрыемства ад вашага імя можа ўзяцца мясцовы кансультант або арганізацыя. Для прыцягнення ўвагі людзей найміце аўтарытэтнага спікера. Скарачэнне бюджэту паездак і павелічэнне колькасці онлайн-канферэнцый азначае, што супрацоўнікі спонсарскіх арганізацый у Лондане ці Вашынгтоне падарожнічаюць усё менш і менш. Таму ім вельмі цікава сустракацца з людзьмі з кампаній, якія яны фінансуюць.

Больш танны варыянт – не падарожнічаць, а праводзіць замест гэтага онлайн-мерапрыемствы на мове спонсара ў зручны для вашай патэнцыйнай мэтавай аўдыторыі час і рэкламаваць іх у сацыяльных сетках.

Каб любы з гэтых варыянтаў спрацаваў, вам трэба мець вельмі добрае ўяўленне пра тое, з чым канкрэтна хоча мець справу спонсар. У ходзе вашай дыскусіі павінна з'явіцца нейкае рашэнне задачы спонсара.

Яшчэ адзін спосаб прыцягнуць новых спонсараў – наведваць канферэнцыі ці мерапрыемствы, на якіх яны таксама будуць прысутнічаць. Вам неабавязкова быць спікерам; вы можаце проста быць прадстаўніком сваёй арганізацыі. У такім выпадку паспрабуйце задаць першае пытанне ў раздзеле пытанняў і адказаў. Так вас хутчэй за ўсё запомняць. 

Пасля сустрэчы падыдзіце да вашага спонсара. Спачатку задайце яму пытанне па тэме яго дакладу або папрасіце савета па канкрэтнай тэме. Затым дайце яму сваю візітную картку і дакумент, у якім даходліва тлумачыцца, чым вы займаецеся і якіх поспехаў дасягнулі. Падрыхтуйце паведамленне, у якім ёсць простае пытанне да спонсара. Спытайце іх, ці магчыма асабістая сустрэча. Можа, з першага разу ў вас нічога не атрымаецца. Паўтарайце ўсё тое ж з рознымі супрацоўнікамі арганізацыі да таго часу, пакуль не знойдзеце патрэбнага чалавека.

Іншы варыянт – наняць чалавека, які будзе вашым прадстаўніком і працаваць няпоўны працоўны дзень. Магчыма, у буйных сталіцах (Лондане, Вашынгтоне і Брусэлі) ёсць людзі, якія працавалі ў пэўным агенцтве, і якія ўсё яшчэ могуць наведваць падобныя падзеі і весці камунікацыю ад вашага імя. Гэты падыход эфектыўны толькі ў тым выпадку, калі вы шукаеце буйное фінансаванне.

Нарэшце, вы можаце далучыцца да еўрапейскай сеткі і стаць яе актыўным удзельнікам. Існуе больш за 50 сетак для людзей, якія працуюць у сферы культуры і крэатыўнасці, так што нешта для вашай арганізацыі дакладна знойдзецца. Падобнае супрацоўніцтва дапаможа вам наладзіць партнёрства з аналагічнай арганізацыяй у краіне вашага спонсара, якая фінансуецца ім жа, і, рэалізоўваючы сумесны праект, вы можаце даведацца пра спецыфіку працы з гэтым спонсарам.

Поспехаў!