Агульнае бачанне. Важна, каб бачанне падзялялі ўсе хто, працуе ў інтарэсах прадпрыемства. Гэта асабліва датычыцца вышэйшага кіраўніцтва, якое можа ўключаць людзей з абсалютна рознымі і ўзаемадапаўняльнымі прафесійнымі навыкамі, але іх бачанне далейшага развіцця арганізацыі павінна быць адзіным.

Лідэрства і бачанне. Адна з ключавых функцый лідэра заключаецца ў тым, каб сфарміраваць бачанне і мабілізаваць намаганні супрацоўнікаў прадпрыемства на рэалізацыю гэтага бачання.

Поспех. Быць паспяховым хоча кожны чалавек і любая арганізацыя. Але слова «поспех» можна вызначаць па-рознаму, таму вельмі важна, каб прадпрыемства вызначыла для сябе, што для яго абазначае поспех.

Унутраны аналіз. Гэта аб'ектыўная ацэнка бягучага стану прадпрыемства, аналіз рэальнага становішча спраў.

Спіс PRIMEFACT. Гэты спіс дапаможа правесці сістэматычны ўнутраны аналіз дзейнасці прадпрыемства па дзевяці аспектах: Людзі, Рэпутацыя, Інтэлектуальная ўласнасць, Рынкавыя даследаванні, Карпаратыўная культура, Фінансы, Гнуткасць, Партнёры, Таленты

Моцныя і слабыя бакі. Унутраны аналіз садзейнічае ўсведамленню моцных і слабых бакоў арганізацыі. Іх ацэнку неабходна праводзіць у параўнанні з канкурэнтамі арганізацыі (гл. Канкурэнтныя перавагі.)

Асаблівасці замест моцных і слабых бакоў. Пры правядзенні ўнутранага аналізу больш карысным будзе проста пералічыць «факты» пра прадпрыемства ці яго «асаблівасці», чым адразу прыступаць да вызначэння таго, што з'яўляецца яго моцнымі і слабымі бакамі. Бо любая асаблівасць прадпрыемства (напрыклад, той факт, што кампанія працуе на знешніх рынках, адносіцца да катэгорыі малых прадпрыемстваў або мае моцны фінансавы складнік) у залежнасці ад кантэксту можа стаць яе перавагай або недахопам. Мэта заключаецца ў тым, каб знайсці такія рынкі і забяспечыць такія абставіны, у якіх асаблівасці арганізацыі сталі б яе моцнымі бакамі.

Аналіз знешняга асяроддзя. Гэта аб'ектыўная і комплексная ацэнка змен, якія адбываюцца ў свеце, у якім прадпрыемства ажыццяўляе сваю дзейнасць. Да знешняга асяроддзя адносяцца фактары і змены, на якія арганізацыя ніяк не можа паўплываць.

PEST-аналіз, які праводзіцца ў рамках аналізу знешняга асяроддзя, прапануе правесці ацэнку дзейнасці арганізацыі па чатырох катэгорыях: палітычныя, эканамічныя, сацыяльныя і тэхналагічныя тэндэнцыі і фактары.

ICEDRIPS-аналіз распрацаваны спецыяльна для культурных і крэатыўных індустрый. Гэта больш складаны аналіз, чым PEST-аналіз. Ён праводзіцца ў рамках аналізу знешняга асяроддзя і прапануе ацаніць дзейнасць арганізацыі па васьмі катэгорыях: Інавацыі, Канкурэнты, Эканамічныя фактары, Дэмаграфія, Нарматыўна-прававое асяроддзе, Інфраструктура, Партнёры, Сацыяльныя тэндэнцыі.

Магчымасці і пагрозы. Метады аналізу PEST і ICEDRIPS, якія выкарыстоўваюцца ў рамках аналізу знешняга асяроддзя, спрыяюць выяўленню асобных магчымасцей і пагроз, якія для кожнай арганізацыі будуць індывідуальнымі.

SWOT-аналіз. Гэта ацэнка моцных і слабых бакоў арганізацыі, а таксама яе магчымасцей і пагроз, што вынікаюць з навакольнага асяроддзя, якія прадпрыемства вызначае ў ходзе ўнутранага аналізу і аналізу знешняга асяроддзя.

Стратэгічнае планаванне робіць упор на спалучэнні пераваг прадпрыемства і магчымасцей, прапанаваных знешнім асяроддзем.

Канкурэнтная перавага. Моцныя і слабыя бакі, магчымасці і пагрозы варта разглядаць у параўнанні з канкурэнтамі. Калі прадпрыемства моцнае ў нейкім напрамку, але ў канкурэнтаў гэты напрамак развіты яшчэ лепш, то гэта будзе лічыцца адносна слабым бокам. Сапраўды гэтак жа слабы бок можа стаць адносна моцным бокам, калі ў канкурэнтаў аналагічны напрамак развіты горш. Магчымасці і пагрозы можна ацаніць тым жа метадам. Такім чынам, нам неабходна выявіць свае адносныя моцныя бакі, адносныя слабыя бакі, адносныя магчымасці і адносныя пагрозы.

Стратэгічны маркетынг. У адрозненні ад аперацыйнага маркетынгу (або маркетынгу камунікацый), стратэгічны маркетынг у першую чаргу разглядае больш агульную карціну на рынках у разрэзе інтарэсаў прадпрыемства. Гэта дазваляе прымаць рашэнні з пазіцый стратэгічнага маркетынгу: якія рынкі варта абслугоўваць, а якія мэтанакіравана пазбягаць. Такія рашэнні павінны прымацца з улікам місіі і канкурэнтных пераваг арганізацыі.

Бізнэс-стратэгія. Гэта план комплекснага развіцця прадпрыемства, які дазволіць яму выйсці з цяперашняга становішча і дасягнуць таго, да чаго яно імкнецца, - свайго бачання. Гэты план павінен улічваць звесткі, атрыманыя ў ходзе SWOT-аналізу, а таксама прымаць да ўвагі канкурэнтныя перавагі і рашэнні з пазіцый стратэгічнага маркетынгу.

Уцягнутасць. Пажадана, каб удзел у стратэгічным планаванні ў той ці іншай меры прымалі ўсе супрацоўнікі прадпрыемства. Гэта дазволіць кожнаму ўнесці свой уклад, і ў кожнага будзе пачуццё дачынення да распрацоўкі стратэгічнага плана.

Бізнэс-формула — гэта свайго роду фундаментальная бізнэс-мадэль крэатыўнага прадпрыемства - то, якім чынам яно будзе рэалізоўваць сваё бачанне ў канкурэнтным асяроддзі, выкарыстоўваючы свае канкурэнтныя перавагі і прынцыпы стратэгічнага маркетынгу і выбіраючы, на якіх рынках яно будзе прадстаўлена, а на якіх - не. Пасля таго як прадпрыемства выведзе рэалістычную бізнэс-формулу, на яе аснове яно можа распрацаваць паўнавартасны бізнэс-план.

Бізнэс-план ці план развіцця — гэта вынік працэсу стратэгічнага планавання, у аснове якога ляжыць бізнэс-формула прадпрыемства. Бізнэс-план - гэта дакумент, які падрабязна апісвае, якія дзеянні будзе ажыццяўляць арганізацыя, каб дасягнуць сваіх мэт і рэалізаваць сваё бачанне.