content
Հայտադիմումների փաթեթ
Ստեղծարար Եվրոպա ծրագրի հայտադիմումների փաթեթը ունի երկու բաղկացուցիչ մաս:

Ստեղծարար Եվրոպա ծրագրի հայտադիմումների փաթեթը ունի երկու բաղկացուցիչ մաս, որոնցից մեկը պարփակում է կոնսորտիումին առնչվող տեղեկություն, իսկ երկրորդը` մասնակից կազմակերպության: Հայտադիմումի երկրորդ մասը առնչվում է հենց իրեն` նախագծին:

Եթե շարժվենք այդ տրամաբանությամբ, ապա աշխատանքը կկարողանանք հեշտությամբ բաժանել տարբեր մասնակիցների միջև: Պետք է ասեմ, որ հայտադիմումների լրացնելն էլ իր հերթին մի փոքրիկ նախագիծ է:

Դրամաշնորհ հայցող կազմակերպության կամ կոնսորտիումի համար տարաբնույթ տվյալներ են անհրաժեշտ: Հայտադիմումում ՄՆԾ-ն նշելիս` Ձեր կազմակերպության տվյալներն ավտոմատ կերպով հայտնվում են: Ձեզ մնում է միայն ստուգել, թե որքանով է այժմեական այդ տեղեկությունը: Ձեզնից կպահանջվի նաև նկարագրել ձեր կազմակերպության գործունեությունը և այն դերը, որ պատրաստվում եք ստանձնել նախագծում: Ակնկալվում է նաև, որ կնշեք այն բոլոր ԵՄ դրամաշնորհները կամ ներկա ծրագրերը, որոնք ստացել եք կամ որոնցից դրական արձագանք եք ակնկալում: Հաճախ նման տեղեկություն գտնելու համար ժամանակ է պահանջվում, եթե կազմակերպությունը չի պահում այդ տեղեկությունը մեկ տվյալների բազայում: Այս կապակցությամբ, ես կառաջարկեի, որ Դուք վաղ սկսեիք տվյալներ հավաքելու գործընթացը:

Հայտադիմումում պարտադիր է նկարագրել ձեր կազմակերպության ֆինանսական և գործառնական կարողությունները, որոնք կհավաստեն այն մասին, որ դուք ի վիճակի եք կատարել նախագծում Ձեր ստանձնած դերը: Եղեք հակիրճ, բայց ` բովանդակալից: Տեսեք, թե որքանով է Ձեր ներկա փորձը համապատասխանում այն դերին, որը պատրաստվում եք ստանձնել նախագծում:

Հայտադիմումում ստուգեք`արդյոք լրացրել եք բոլոր դաշտերը: Եթե ձեզնից հայցում են Ձեր կազմակերպությանը չառնչվող տեղեկություն, նշեք այդ մասին, կամ պարզապես լրացրեք դաշտը գծիկով (“—”) կամ զրոյով (“0”): Կարևոր է դաշտեր դատարկ չթողնելը: Այս դեպքում խառնաշփոթ չի առաջանա, և պարզ կլինի, թե արդյոք հայցվող տեղեկությունը չի առնչվում Ձեր կազմակերպությանը, թե դուք պարզապես մոռացել եք ընդգրկել այն:

Ստուգեք, թե ինչ հավելյալ փաստաթղթեր են Ձեզնից պահանջվելու և սկսեք հավաքել դրանք գործընկերներից: Խոսքը գնում է հատկապես ստորագրվելիք փաստաթղթերի մասին: Պահանջվող փաստաթղթերի մեծ մասի համար առկա են ձևանմուշներ:

Հայտադիմումի երկրորդ բաղադրիչը ենթադրում է նախագծի նկարագիր, սակայն նախքան այս դաշտը լրացնելը, ես կառաջարկեի համաձայնության գալ գործընկերների հետ առաջադրանքների, ժամանակացույցի և բյուջեի վերաբերյալ:

Հնարավոր գործընկերների հետ բանակցելու համար կարող եք մեկ էջի սահմաններում ամփոփել հետևյալ հարցերի պատասխանները.

1. Ի՞նչ եք պատրաստվում անել:

2. Ինչքա՞ն է կազմում բյուջեն:

3. Ի՞նչ եք ակնկալում գործընկերներից:

4. Ի՞նչ կտա նախագիծը Ձեր գործընկերներին:

Նախագծի նկարագիրը պետք է գրվի բոլոր գործընկերների հետ համատեղ: Նախ և առաջ դա կօգնի ձեզ հասկանալ, թե ովքեր են Ձեր գործընկերները, և ինչ կարող եք ակնկալել նրանցից նախագծի իրականացման ընթացքում:Դրա հետ մեկտեղ` յուրաքանչյուր ոք գիտակցում է, թե որոնք են ապագայի հնարավորությունները և կիրառությունները:

Առանց սույն հիմնական բաղադրիչների անիմաստ է սկսել հայտադիմումներ լրացնելը: Գրանցման ընթացքում հավելյալ տեղեկությունը կմանրամասնվի:

Նախագծի նկարագրի ձևանմուշ գոյություն չունի. փորձեք այն այնպես շարադրել, որ ընթերցողը վայելի այն: Հենց այստեղ է, որ ձեր գաղափարը պիտի վաճառեք գնահատողներին: Օգտվեք Word ծրագրի հնարավորություններից` Ձեր տեքստը համակարգելու, այն պարբերությունների բաժանելու համար: Ընդգծեք կարևոր մասերը, կիրառեք լուսաբանող աղյուսակներ կամ նկարներ: Մի խոսքով` արեք ամեն ինչ, որպեսզի այն գնահատողի համար հաճելի ընթերցանության նյութի վերածեք: Մի մոռացեք նաև, որ գնահատողը պետք է կարողանա կարդալ և հասկանալ, թե ինչի մասին է Ձեր նախագիծը նույնիսկ այն դեպքում, երբ նա չի ցանկանում կարդալ ողջ փաստաթուղթը: Հիշեք, որ գնահատողին ոչինչ հայտնի չէ Ձեր կազմակերպության կամ նախագծի մասին:

Այդ իսկ պատճառով էլ, մի վարանեք նույնիսկ ամենապարզ և ակնհայտ թվացող կետերը լուսաբանել: Հիմնավորեք ձեր շարադրանքը և ներկայացրեք նախապատմությունը: Անհրաժեշտության դեպքում`գրեք մանրամասն, դրա հետ մեկտեղ` հակիրճ և բովանդակալից:

Վերջապես, ժամանակի առկայության դեպքում միգուցե ցանկություն կունենաք, որ ինչ-որ մեկը կարդա Ձեր դիմումը` տեսնելու, թե արդյոք այն գրված է մատչելի լեզվով, և արդյոք կարելի է ինչ-որ բան ավելացնել:

Ես կառաջարկեի սկզբում շարադրել նախագծով նախատեսվող միջոցառումները և բյուջեն, որպեսզի ինքներդ հասկանաք ժամանակացույցը և ծախսերը: Այնուհետև` հիմնված այս փաստաթղթի վրա, Ձեզ համար ավելի հեշտ կլինի լրացնել ծրագրի հայտադիմումը և բյուջեի ձևանմուշը:

Հայտադիմումը լրացնելիս կառաջարկեի կարդալ գնահատման չափորոշիչները, քննադատ հայացք նետել` տեսնելու, թե որքանով է Ձեր առաջարկած նախագիծը համապատասխանում այդ չափորոշիչներին և մտածել, թե արդյոք կատարելագործման տեղ դեռ կա:

Ամփոփելով` կցանկանայի նշել, որ հայտադիմում լրացնելը այնքան էլ խրթին չէ, ինչպես այն կարող է թվալ սկզբում: Այն պարզապես պահանջում է բոլոր գործընկերների ժամանակն ու ջանքերը: Մի մոռացեք, որ այն ներկայացնում է Ձեր կոնսորտիումը, նախագիծը և հեռանկարները: 

Թող Ձեր նախագիծը հաջողությամբ պսակվի:

Կիսվել ընկերների հետ