Տեսլական և հաջողություն

Ռազմավարական տեսլականը և գործարար հաջողության հստակ սահմանումը ռազմավարական ծրագրավորման էական բաղադրիչներ են բոլոր ստեղծարար բիզնեսների և մշակութային ձեռնարկությունների համար:

Տեսլականը հստակեցնում է ստեղծարար բիզնեսի կամ մշակութային ձեռնարկության ապագայի միտումները: Հայտնի նաև որպես ռազմավարական տեսլական` այն իրենից ներկայացնում է երազանքներ ապագայի մասին, բառերով արտահայտված մի պատկեր, որի հիմնական նպատակը մարդկանց ներշնչելն է թե՛ հույզերի, թե՛ տրամաբանության միջոցով:

Իր` «Ամենաարդյունավետ մարդկանց յոթ սովորույթները» ամենագնայուն գրքում Սթիվեն Ռ. Քովին խորհուրդ է տալիս սկսել` մտքում պատկերացնելով, թե ինչպիսին է լինելու վերջը:

Առաջնորդի հիմնական գործառույթներից մեկը մարդկանց տեսլականով ոգևորելն է: Սա կոչվում է ոգեշնչող առաջնորդաոճ:

Բոլորը պետք է իմանան իրենց ընկերության և կազմակերպության ռազմավարական տեսլականը և ընդունեն այն:

«Տեսլականը հստակեցնում է, թե որ ուղղությամբ պետք է շարժվի կազմակերպությունը:»

Ջոն Փ. Կոտլեր Հարվարդի գործարար ուղեցույց

Հաջողակ ստեղծարար բիզնեսներին անհրաժեշտ է ստեղծարար տաղանդի և ռազմավարական գործարար կառավարման համակցությունը, որը ես անվանում եմ շապիկի և կոստյումի համակցություն:

Երբեմն այս երկու բաղադրիչը կարող են դրսևորվել մեկ անհատի աշխատանքում, սակայն հիմնական փորձը ցույց է տալիս, որ ստեղծարարության և գործարարության ներդաշնակությունը ծնվում է ավելի մեծ թիմում, որտեղ ամենաքիչը երկու մարդ կա:

Այսպիսով, նույնիսկ եթե ներգրավված գործընկերները զանազան խառնվածքի տեր մարդիկ են` օժտված տարբեր հմտություններով, նրանք պետք է ծառայեն միևնույն տեսլականին:

Գործընկերները կարող են տարակարծիք լինել ռիսկին, աճին, ֆինանսական հատուցումներին առնչվող հարցերում: Այս դեպքոմ յուրաքանչյուր ոք կարող է յուրովի պատկերացնել այն գործարար ռազմավարությունը, որն իրենց կօգնի հասնել տարբեր նշանակետերի:

Ինչպես տեսնում ենք, համատեղ տեսլականի առկայությունը լավագույն սկիզբն է: Եթե մարդիկ սերտ համագործակցում են հետապնդելով միանգամայն տարբեր նպատակներ, դա կարող է հանգեցնել հակամարտության կամ փակուղու:

Ջենիֆեր Հարիսը` Management Today-ի /Կառավարումն այսօր/ թղթակիցը մատնանշում է, որ հնարավոր է համակցել տարաբնույթ հմտություններ, բայց ոչ` դիրքորոշումներ: Ես համամիտ եմ նրա հետ:

1904 թվականին Ֆրեդերիկ Հենրի Ռոյսը հանդիպեց Չարլզ Սթյուարթ Ռոլսին Մանչեսթերում: Առաջինն ինժեներ էր, իսկ երկրորդը` գործարար: Նրանց գործընկերության արդյունքում ծնվեց հանրաճանաչ Ռոլս-Ռոյս ընկերությունը:

Ստեղծարար ձեռներեցները հասնում են հաջողության`ապագայի հստակ տեսլականը և վերջնական նպատակը պատկերացնելու միջոցով: 

Հաջողություն

Մեզնից յուրաքանչյուրը ցանկանում է լինել հաջողակ, սակայն հաջողության բազում սահմանումներ կան: Տարբեր մարդիկ տարբեր ձևով են ընկալում հաջողությունը, այդ իսկ պատճառով բավարար չէ կրկնել, որ ցանկանում ենք, որ ձեր բիզնեսը հասնի հաջողության: Հաջողության տարաբնույթ սահմանումներով առաջնորդվելն ինքնին անհաջողության կհանգեցնի, ավելի լավ է հստակեցնել և գործընկերների հետ համաձայնեցնել հաջողության ձեր սահմանումը` առաջնորդվելով ձեր իսկ պայմաններով, և ոչ թե այլ մարդկանց կարծիքով կամ ակնկալիքով:

Ստեղծարար բիզնեսների հետ որպես խորհրդատու աշխատելիս ես ոչ թե խնդրում, այլ պահանջում եմ, որ նրանք սահմանեն հաջողությունը: Եթե իրենք համոզված չեն, թե որն է իրենց վերջնական նպատակը, ապա ինչպես ես կարող եմ օգնել նրանց հասնել այնտեղ: Հաջողության սահմանումը հստակեցնում է տեսլականը:

Ֆինանսական հաջողությունը ձեռնարկություններից մեծ մասի համար կարևոր է, բայց ոչ բեկումնային: Ստեղծարար ձեռներեցներն ինձ հայտնում են իրենց ցանկությունները` ունենալ հատուցող աշխատանք, հետաքրքիր նախագծերի ընտրության հնարավորություն, ձեռք բերել ճանաչում իրենց ոլորտում ինքնավարություն, գործընկերներ, ինչպես նաև վայելել ներդաշնակություն աշխատանքային և անձնական կյանքի միջև:

Բիզնեսի աճ

Հստակեցրու քեզ համար, թե ինչպես և որ ուղղությամբ ես ցանկանում աճեցնել քո բիզնեսը: Փոքր ձեռնարկությունները կարող են լինել շահութաբեր և թողնել իրենց հասարակական ազդեցությունը: Ամեն ինչ ծավալով չի որոշվում:

Կազմակերպության տեսլականը ու հաջողության սահմանումն հստակեցնելը ցանկացած գործարար ռազմավարության կամ ծրագրի լավագույն սկիզբն են և կօգնեն բացահայտել կազմակերպության առաքելությունը, արժեքներն ու այն ամենը, ինչ ընկած է վերջինիս հիմքում:

Առաքելություն և փիլիսոփայություն. ահա այն երկու բանալին, որ կօգնեն մեզ սահմանել բիզնեսը: Ոչ անունը, ոչ էլ կանոնադրությունը դեր չեն խաղում բիզնեսի սահմանման մեջ:

«Հստակ և իրատես գործարար նպատակները սահմանվում են կազմակերպության առաքելությամբ և նպատակներով»:

Փիթեր Դրուքեր. /տես` Փիթեր Դրուքերի Բիզնեսի տեսությունը/