content
Ռազմավարական մարքեթինգ
Մարքեթինգ տերմինին կարելի է բազում բացատրություններ տալ: Շատերն այն նույնականացնում են գովազդի կամ առաջխաղացման հետ: Սա, թերևս, մարքեթինգի մեկ գործառույթն է, ինչպես օրինակ, գործառնական մարքեթինգի կամ մարքեթինգային հաղորդակցման դեպքերում:

Ռազմավարական մարքեթինքը իրենից ներկայացնում է կարևոր որոշումներով հարուստ մի պատկեր և պատասխանում հետևյալ հարցերին.

• Ո՞ր գործարար ոլորտն է մերը:

• Ի՞նչ են իրականում ցանկանում հաճախորդները:

• Որտե՞ղ կարող ենք աչքի ընկնել մրցակցային շուկայում:

• Ռազմավարական որոշումներ կայացնելու արդյունքում ո՞ր հաճախորդներին չենք սպասարկելու:

• Ո՞րն է մեր եզակի գործարար բանաձևը:

Ռազմավարական մարքեթինգի արդյունքում մենք կիմանանք, թե ովքեր են մեր մրցակիցները, կբացահայտենք նրանց առավելությունները, որպեսզի կողմնորոշվենք, թե որ շուկաներին կարող ենք ավելի լավ սպասարկել, քան մեր մրցակիցները: Դրա հետ մեկտեղ, ռազմավարական մարքեթինգը օգնում է նաև հասկանալ, թե որ շուկաներում հարկ չկա փորձել մեր ուժերը, քանի որ այնտեղ ներգրավված մեր մրցակիցները մեզնից լավ են աշխատում: Այս կապակցությամբ, անհրաժեշտ է հասկանալ շուկայի կարիքները, պատրաստակամ լինել ձևավորել բիզնեսն ու դրա արդյունքները թիրախային հաճախորդների շուրջ, այլ ոչ թե ստիպել, որ հաճախորդը հարմարվի ձեռնարկության ապրանքներին և ծառայություններին:

Ռազմավարական մարքեթինգի արդյունքում մշակվում է իրագործելի գործարար բանաձև, որը դիտարկում է ձեռնարկության մրցակցային առավելությունը և ընտրությունները, որպեսզի կողմնորոշվի, թե որ շուկաներին է սպասարկելու:

Կարճ ասած` ռազմավարական մարքեթինգը պահանջում է մտածելակերպի կտրուկ փոփոխություն և «Եկեք ամեն ինչ անենք, որպեսզի կարողանանք վաճառել բոլորին» մտածողության փոխարեն առաջադրում «Փորձենք անել միայն այն, ինչ մեր մրցակիցները չեն կարողանում մեզ նման լավ անել և գործենք միայն այն շուկաներում, որտեղ պահանջարկ են վայելում այն ծառայությունները, որոնք մենք գերազանց ենք կատարում»:

Միայն երբ ռազմավարական մարքեթինգի հիմնական հարցերը լուծում ստանան, մենք կարող ենք անդրադառնալ գործառնային մարքեթինգին կամ մարքեթինգային հաղորդակցմանը:

Երբ արդեն հստակ որոշում ենք կայացրել, թե որ շուկաների վրա ենք կենտրոնացնելու մեր ուժերը, կարող ենք համապատասխանեցնել մեր ուղերձները թիրախային հաճախորդների պահանջներին:

Դեռ ավելին` կարող ենք լսել մեր կողմից ընտրված շուկայում առկա հաճախորդներին, որպեսզի հասկանանք, թե ինչ են իրականում նրանք ցանկանում գնել:

Մարքեթինգը կարելի է սահմանել իբրև ձեռնարկությունը հաճախորդի տեսանկյունից դիտարկելը: Մարքեթինգի աստված Փիթեր Դրյուքերը նշել է. «Մարքեթինգը ոչ միայն ավելի լայն հասկացություն է, քան վաճառքը, այն նաև սահմանափակ չէ, քանի որ ընդգրկում է ողջ բիզնեսը: Այն ամբողջական բիզնեսն է`վերջնական արդյունքների, ավելի կոնկրետ` հաճախորդի դիտանկյունից»:

Վերջիվերջո ռազմավարական մարքեթինգը ողջ ձեռնարկության միտումնավոր համապատասխանեցումն է մեր կողմից ամենայն զգուշությամբ ընտրված հաճախորդների փոփոխվող կարիքներին:

Սա ենթադրում է որոշ շուկաներից խուսափելը և ուժերը ռազմավարության արդյունքում ընտրված շուկաների, խորշերի և հաճախորդների վրա կենտրոնացնելը:

Հետևաբար ռազմավարական մարքեթինգը վերաբերում է այնպիսի բարձր մակարդակի որոշումներին, ինչպիսին է ձեռնարկության ուղղվածություն ընտրելը: Ինչպես տեսնում ենք այն հաջողությամբ խուսանավում է մրցակիցների միջով, գործածում իր մրցակցային առավելությունը և որպես թիրախ ընտրում հաճախորդների հստակ խմբերի, որպեսզի կարողանա հասնել իր նպատակներին և տեսլականին:

Ահա թե ինչու Հյուլեթ Փեքարդ ձեռնարկության համահիմնադիր Դեյվիդ Փեքարդն ասել է «Մարքեթինգը չափազանց կարևոր է, որպեսզի սահմանափակվի զուտ մարքեթինգային վարչությամբ:»

Կիսվել ընկերների հետ