content
Դեպքեր/օրինակներ
Դեպքեր/օրինակներ

Դեպքերի մեկնաբանությունները և օրինակները վերցված են Լիդիա Վարբանովայի գրքից «Արվեստի բնագավառում միջազգային ձեռնարկատիրություն» /2016/, Նյու Յորք, Լոնդոն, Ռաութլեջ https://www.amazon.com/International-Entrepreneurship-Arts-Lidia-Varbanova/dp/1138844357

Բաքիթֆիթ /ԱՄՆ/ ՝ միջազգային կապերից և պատմություններից ծնված գործարար մոդել

Բաքիթֆիթ (www.bucketfeet.com) ընկերությունը զբաղվում է արվեստագետների կողմից մշակված կոշիկների արտադրանքով: Ընկերության նպատակն է կապեր հաստատել արվեստի մեջ ներգրավված տարբեր մարդկանց հետ` համագործակցելով տարբեր երկրների սկսնակ նկարիչների հետ:

Ռաջա Նեմանին ընկերության համահիմնադիրներից է: 2008 թվականին իր գործունեությունը ֆինանսների ոլորտում ավարտած համարելով` նա որոշեց ճանապարհորդել աշխարհով և հանդիպեց Աարոն Ֆայրշթայնին, երբ նրանք երկուսով կամավորական աշխատանքով էին զբաղվում Բուենոս Այրեսում: Նրանք ընկերացան, և Ռաջան գնեց ձեռքով նկարազարդած սպորտային կոշիկներ Աարոնից, ով սկսել էր զբաղվել արվեստի նման գործերի վաճառքով, երբ դեռ սովորում էր: Կոշիկները յուրահատուկ էին, և շատ մարդիկ հարցնում էին, թե որտեղ է հնարավոր դրանք ձեռք բերել: 2011 թվականին Ռաջան և Աարոնը հիմնեցին իրենց սեփական ընկերությունը Չիկագոյում: Նրանց գործարար մոդելի հիմքում ընկած է արվեստագետների կողմից նախագծված յուրաքանչյուր կոշիկի բացառիկությունը: Ողջ աշխարհից արվեստագետներ կարող են դիմել դառնալու Բաքիթֆիթի նկարիչ: Լավագույն գործերը տպագրվում են կոշիկների վրա, իսկ այն նկարիչները, ում դիզայնը ընտրվում է, ստանում են 250 դոլար և հավելյալ 1 դոլար յուրաքանչյուր վաճառված զույգից: Ընկերությունն իր շուրջն է համախմբել ավելի քան 100 երկիր ներկայացնող 25 000 արվեստագետի, այդ թվում` նկարիչների, դիզայներների, նկարազարդողների:1 Ընկերությանը բացառիկություն է հաղորդում ոչ միայն գործարար մոդելը և ապրանքանիշը, այլև յուրաքանչյուր նկարչի կյանքի պատմությունը, ինչպես նաև արտադրանքի և արվեստագետի կյանքի միջև առկա կապը: Բաքիթֆիթը հիմնականում առցանց է իրականացնում իր վաճառքը` անկախ բուտիկների և մանրածախ վաճառքի միջոցով: Ընկերությունը միջազգայնորեն աճում է` ուղիղ առաքում իրականացնելով ԱՄՆ, Ավստրալիա, ՄԹ, Գերմանիա և Կանադա: Ընկերության ծրագրերի մեջ մտնում է Ասիայում մանրածախ արվեստանոցներ բացելը, որոնցից առաջինը նախատեսվում է Մանիլայում: Բաքիթֆիթի կոշիկները վաճառվում են 20 երկրում: Ընկերության եկամտի ավելի քան 50 տոկոսը գալիս է արտերկրից:

Սաունդքլաուդ. Ֆրիմիում գործարար մոդել, որը համաշխարհային տարածում գտավ

Սաունդքլաուդը /https://soundcloud.com/ առաջավոր աուդիո հարթակներից է, որը ստեղծվել է ստեղծողների համար և օգտատերերին աննախադեպ հնարավորություն է տալիս օգտվել աշխարհի ամենամեծ ձայնադարանից, կապ հաստատել միմյանց հետ և առցանց կամ շարժական տեխնոլոգիաների միջոցով ողջ աշխարհի հետ կիսվել նոր նմուշներով: 2014 թվականին մեկնարկեց On SoundCloud գործընկեր ծրագիրը /https://on.soundcloud.com/: Ներկայումս ծրագրի հեղինակները կարող են փող վաստակել իրենց աշխատանքով:

Սաունդքլաուդը հիմնադրվեց Բեռլինում 2007 թվականին ձայնային դիզայներ Ալեքսանդր Լյունգի և արվեստագետ Էրիկ Վալֆորսի կողմից, և մեկնարկեց 2008-ին: Հեղինակները գիտակցեցին, որ հնչյուններն ու երաժշտությունը ի տարբերություն նկարների, տեքստերի և հոլովակների, դեռևս չիրացված տարածք էին համացանցում: Եկամուտ վաստակելու ֆրիմիում մոդելը և համաշխարհային մակարդակով գործելու ձգտումը մշակվել էր դեռ նախնական փուլում: Այն, որ ստեղծված նյութի մի մասը նախատեսված էր միայն բաժանորդների համար, հետագայում օգնեց հեղինակներին ճիշտ ձևակերպել իրենց առաջարկը:

Ամեն րոպե 12 ժամ տևողությամբ ձայնային ֆայլեր են բեռնվում կայք, որտեղ ներկայումս 100 միլիոնից ավել սաունդթրեքեր կան: Կայքն ամսական այցելում են ավելի քան 175 մլն. օգտատեր: Ընկերության նորարար առանձնահատկությունները հետևյալն են ՝

  • Այն հնարավորություն է ընձեռում ընկերների կամ հանրության հետ կիսվել բնօրինակ երաժշտությամբ կամ ձայնագրություններով` բլոգերում, կայքերում կամ սոցիալական ցանցերում տեղադրելով շարժական ձայնագրիչները:

  • Այն թույլ է տալիս, որ օգտատերերը մեկնաբանություն թողնեն անմիջապես ձայնագրության վրա: Այս մեկնաբանությունները տեսնում են այլ օգտատերեր, երբ հնչում է երաժշտությունը:

  • Այն թույլ է տալիս օգտատերերին անվճար լսել այնքան ձայնագրություն, որքան իրենք ցանկանում են, իսկ երաժիշտներին 180 րոպե անվճար ձայնագրության հարթակ է տրամադրում:

  • Պրեմիում կամ առաջնակարգ բաժանորդագրությունները հավելյալ առավելություններ են տրամադրում բաժանորդներին` ներառյալ ավելի շատ բեռնելու ժամանակ և մանրամասն վիճակագրություն:

  • Առաջնակարգ գործընկերները հնարավորություն ունեն հարթակում գումար վաստակել On SoundCloud ծրագրի միջոցով, որի օգտագործման իրավունքն այժմ միայն ԱՄՆ-ում է: Ծրագիրը ներկայումս ունի ավելի քան 20 000 գործընկեր, այդ թվում նաև ` փոդքասթերներ և նորահայտ արվեստագետներ:

Սաունդքլաուդում աշխատում են ավելի քան 300 մարդ` Բեռլինում, Լոնդոնում, Նյու Յորքում և Սան Ֆրանցիսկոյում տեղակայված գրասենյակներում: Սա այն տեղն է, որտեղից կարելի է գտնել գրեթե բոլոր ձայնագրությունները, և որտեղ երաժիշտները կարող են ներկայացնել իրենց երաժշտությունը: Սաունդքլաուդը արժանացել է շատ մրցանակների, ներառյալ` համաշխարհային տնտեսական ֆորումի տեխնոլոգիական պիոներներ, Ֆասթ Քոմփանիի «Նորարարություն դիզայնի միջոցով» մրցանակների և այլն:  

Կիսվել ընկերների հետ