Եղեք մանրակրկիտ: Մտածեք, թե ինչ տեղեկատվություն է Ձեզ անհրաժեշտ: 

• Ձեզ կարող են ուղղորդել ստորև նշված հարցերը.
• Ո՞ր երկրներում են հանձնում տվյալ մրցանակները:
• Ինչպիսի՞ թեմատիկա ունեցող ծրագրեր են դրանք հովանավորում:
• Որքա՞ն ֆինանսական օգնություն է տրամադրվում:
• Քանի՞ հայտ է սովորաբար ներկայացվում:
• Ո՞րն է հաղթող առաջարկների և դիմումների հարաբերակցությունը:
• Ո՞ր իրավական կառույցներն են ենթակա հովանավորման:  
• Հիմնական կոնտակտային տվյալները և այլն:

Այնուհետև կազմեք այս բոլոր հարցերն ընդգրկող մի աղյուսակ:  Գրեք հովանավորներին ուղղահայաց սյունակում, իսկ ձեր հարցերը` վերևի հորիզոնական տողում: Պատկերացրեք, թե սա գնացուցակի համեմատության կայք է: Նման ձևաչափը ճիշտ հարցեր ուղղելու դեպքում հստակ ցույց կտա յուրաքանչյուր հովանավորի առավելությունը մյուսի նկատմամբ:

Դուք կարող եք այս աշխատանքը հանձնարարել խորհրդատուին կամ ինտերնին: Եթե որոշեք ինքներդ անել այս աշխատանքը, ապա սկսեք կայքից: Յուրաքանչյուր հովանավորից օգտագործեք այն տեղեկությունը, որն անհրաժեշտ է ձեր աղյուսակի համար:

Դրա հետ մեկտեղ ուշադրություն դարձրեք երկու հավելյալ բաժիններին: Սկզբում ուսումնասիրեք այն էջերը, որտեղ նշված են գործընկերները: Այստեղ դուք կարող եք գտնել այնպիսի կազմակերպություններ, որոնց մասին նախկինում չեք լսել: Նման ճանապարհով կարող եք որոշ ոգևորիչ և անսպասելի բացահայտումներ անել:

Ինչպես նաև ստուգեք նորությունների, բլոգերի կամ տարեկան հաշվետվությունների առկայությունը: Հենց նման էջերում կարող եք գտնել հուշումներ ապագայի հնարավոր գերակա ուղղությունների մասին, ինչպես նաև տեղեկատվություն ավարտին մոտեցող նախագծերի մասին: Այս տեղեկությունը Ձեզ ևս պետք կգա: Այս հիմնական մեջբերումները և դրույթները դուք կկարողանաք գործածել հովանավորի հետ զրուցելիս: Տեղեկացված լինելը ցույց կտա նվիրատուներին, որ կատարել եք  Ձեր առաջադրանքը:

Երբ հասնեք ձեր ուսումնասիրության ավարտին, մի կողմ դրեք նյութերը մի քանի օրով և վերադարձեք դրանց թարմ ուղեղով:

Այս փուլում, հավանաբար, օգտակար կլինի ձեր ընթերցած նյութերը քննարկել այլ մարդկանց հետ:  Ոչ բոլոր նվիրատուների կայքերն են թարմացված և հստակ տեղեկատվություն ներկայացնում: Փորձեք գտնել երրորդ կողմ, ում հետ կարող եք զրուցել (դա կարող է լինել կազմակերպություն, որ տվյալ հովանավորից գումար է ստացել կամ նախկին աշխատակցից): Հարցրեք նրանց կազմակերպության վարած ռազմավարության և փորձի մասին: Նման կերպ կարող եք բացահայտել, որ Արևելյան Եվրոպան առաջնահերթություն չունի, թեև նրանց կայքը հակառակն է պնդում, կամ որ նորանշանակ տնօրենը շատ հետաքրքրված է տվյալ տարածաշրջանով և հայտարարելու է գալիք տարվա ֆինանսավորման աճի մասին: Նմանատիպ գիտելիքը ձեզ առավելություն կտա մյուսների նկատմամբ:

Դուք կարող եք նաև անմիջականորեն կապվել հովանավորի հետ, սակայն այս փուլում զգույշ եղեք: Քննարկեք Ձեր ուսումնասիրությունից բխող միայն ընդհանուր հարցեր: Մի′ բարձրաձայնեք որևէ մտքեր: 

Այնուհետև, ըստ առաջնահերթության սահմանեք այն կազմակերպությունները, որոնց  հետ ձեր համոզմամբ ունեք աշխատելու առավել մեծ հնարավորություններ:  Դրանք այն կազմակերպություններն են, որոնք հավանություն են տալիս և աջակցում են այն ծրագրերին, որոնք Դուք իրականացրել եք նախկինում  կամ պատրաստվում եք իրականացնել:

Սա կարելի է անել` աղյուսակին ավելացնելով գնահատման համակարգ` կանաչ եռանկյունանշի կամ կարմիր խաչի տեսքով, կամ լուսանշանների համակարգ: Փոխեք տողերի հաջորդականությունը, որպեսզի ամենահամապատասխան հովանավորները լինեն վերևում:

Լավագույն դեպքում պետք է ուշադրություն դարձնել առաջին ամենաբարձր գնահատական ունեցողներին: Թող մեկ տարի նրանք լինեն Ձեր ուշադրության կիզակետում: Այնուհետև սևեռեք Ձեր ուշադրությունը մյուսների վրա: