1. Ամենակենտրոնում մարքեթինգն է: Մարքեթինգը կարևոր է ողջ ձեռնարկության առաքելության, ռազմավարության և հաջողության համար: Այն մատնանշում է, թե որտեղ է բիզնեսը դիրքավորվել շուկայում` հաճախորդների և մրցակիցների տեսանկյունից:

2. Տեսլականը կամ ռազմավարական տեսլականը սահմանում է ստեղծարար բիզնեսի կամ ձեռնարկության ապագայի միտումները: Այն խոսքերի միջոցով արտահայտում է ապագայի վերաբերյալ երազանքների պատկերը` ոգեշնչելով թե մարդկանց սրտերը, թե բանականությունը:

3. Հաջողություն: Յուրաքանչյուր մարդ կամ կազմակերպություն ձգտում է հաջողության: Քանի որ հաջողության սահմանումը կարող է տարաբնույթ լինել, անհրաժեշտ է, որ ձեռնարկությունը ինքը սահմանի, թե ինչ է հասկանում «հաջողություն» ասելով:

4. Ի՞նչ է նշանակում մարքեթինգ: Այս բառը կիրառում են մատնանշելու տարբեր երևույթներ տարբեր մարդկանց մոտ: Հաճախ այն բնութագրում է զուտ վաճառքի մեթոդները: Մարքեթինգ հասկացությունն իր մեջ ընդգրկում է նաև մարքեթինգային ռազմավարությունը և հետազոտությունը:

5. Մարքեթինգի բաժին: Շատ ձեռնարկությունների մարքեթինգի բաժինը հենց գովազդի և առաջխաղացման բաժինն է: Սակայն ռազմավարական դիտանկյունից` մարքեթինգի բաժնում ներգրավված են նաև ձեռնարկատերը, գլխավոր կառավարիչը կամ տնօրենների խորհուրդը:

6. Ռազմավարական մարքեթինգն ընդդեմ գործառնականի: Ռազմավարական մարքեթինգը գործ ունի որոշակի ապրանքներ ընտրելու և միայն որոշակի շուկաների վրա կենտրոնանալու հետ: Գործառնական մարքեթինգը կամ մարքեթինգի հաղորդակցությունը զբաղվում է հատուկ շուկաներին ուղղված ուղերձներ կազմելով: Առաջին քայլը ռազմավարական մարքեթինգինն է:

7. Մարքեթինգային ռազմավարությունը յուրաքանչյուր ձեռնարկության ուրույն բանաձևն է, որի հիմքում ընկած են կազմակերպության առաքելությունը, ձեռնարկության դիրքորոշումը մրցակիցների նկատմամբ շուկայում և ամենայն ուշադրությամբ ընտրված հաճախորդները:

8. Ռազմավարական մարքեթինգը ենթադրում է շուկաների և շուկաների հատվածների մանրակրկիտ ընտրություն: Այն նաև օգնում է մեզ գիտակցաբար խուսափել շուկայի այն հատվածներից, որտեղ հաջողության հասնել չենք կարող.

9. Շուկայի հետազոտությունը ենթադրում է հաճախորդներին լսելը: Շուկայի հետազոտության ծրագրերը չպետք է անպայման լինեն բարդ և թանկ: Մենք կարող ենք դիմել պարզ և մատչելի հնարքների օգնությանը` մեր հաճախորդների դիտանկյունը հասկանալու համար: Իր բնույթով շուկայի հետազոտության մեջ հնարներից ավելի է կարևոր է դիրքորոշումը, հավատը, որ ամենագետ չես և լավագույն հաճախորդներից կարող ես քաղել օգտակար գաղափարներ ու կարծիքներ

10. Մրցակցային առավելություն. անհրաժեշտ է ընդունել շուկայի մրցունակությունը և այն, որ որոշ մրցակիցների մեզնից լավ է հաջողվում որոշակի ապրանքներ թողարկելը և ծառայություններ մատուցելը: Մենք կարող ենք որոշել նրանց հետ ուղղակի մրցակցության մեջ մտնել և արդյունքում տանուլ տալ: Ռազմավարության տեսանկյունից` կարող ենք խորամանկությամբ գերազանցել նրանց և կենտրոնանալ միայն նրա վրա, ինչը մեզ մոտ լավ է ստացվում: Հարցը, որ պիտի ուղղենք ինքներս մեզ հետևյալն է. «Ինչում կարող ենք գերազանցել մեր մրցակիցներին»: Սա կօգնի մեզ բացահայտել մեր մրցակցային առավելությունները և հասկանալ թե ինչպես կարող ենք գերազանցել մեր մրցակիցներին:

11. Մարքեթինգի բաղադրիչները: Մարքեթինգային հաղորդակցման այս եղանակը պարզ և արդյունավետ է: Յուրաքանչյուր ապրանքի և ծառայության համար բացահայտեք թիրախային շուկան կամ մի քանի տարբեր շուկա: Շուկան մարքեթինգի առաջին բաղադրիչն է:

Երկրորդ` յուրաքանչյուր շուկայի համար կազմեք ուղերձ: Ձեր երկրորդ բաղադրիչը ուղերձն է: Եթե մի քանի շուկայի հետ եք գործ ունենալու, հնարավոր է, որ յուրաքանչյուր շուկայի համար առանձին ուղերձ անհրաժեշտ լինի: Ուղերձն, անշուշտ, պետք է ընդգծի հաճախորդների շահերը: Ուղերձի փոխանցման եղանակը երրորդ բաղադրիչն է, որի օգնությամբ մենք կարող ենք յուրաքանչյուր շուկայի հասցնել համապատասխան ուղերձները: Անհրաժեշտ է ընտրել փոխանցման լավագույն միջոցը` ուշադրությունը կենտրոնացնելով շուկայի հաճախորդների վրա:

12. Բաղադրիչների ճիշտ հերթականությունը հետևյալն է` Շուկա, Ուղերձ և Փոխանցման Եղանակ: Մարքեթինգային հաղորդակցման հիմնական սխալների կամ ձախողումների պատճառը նշված բաղադրիչները սխալ հերթականությամբ դիտարկելն է:

13. Տարբեր ուղերձներ տարբեր հաճախորդների համար: Նույնիսկ միևնույն ապրանքի մեջ հաճախորդները կարող են տարբեր բաներ արժևորել: Այդ իսկ պատճառով էլ, մեզ անհրաժեշտ է ունենալ տարբեր հաղորդագրություններ` նախատեսված տարբեր հաճախորդների համար:

14. Հաղորդակցման լավագույն եղանակը ամենահարմարն է հաճախորդի տեսանկյունից: Ընտրությունը չպետք է կատարվի ձեր նախասիրության հիման վրա:

15. Սոցցանցերը. Ֆեյսբուքը, Թվիթերը, Ինստագրամը և այլ սոցիալական կայքերը կարող են արդյունավետ հարթակ լինել մարքեթինգային հաղորդակցման համար: Ինչևէ, նրանք պետք է կիրառվեն միայն այն դեպքում, երբ դուք գտնում եք, որ դրանք լավագույն մեթոդն են որոշակի շուկաներին հստակ հաղորդագրություններ փոխանցելու համար: Այդ մասին արդեն նշեցինք մարքեթինգի բաղադրիչներին նվիրված մասում:

16. Միջազգային մարքեթինգը պետք է հաշվի առնի նաև տարաբնույթ մշակույթների, ավանդույթների և լեզուների առանձնահատկությունները: Այլ երկրների հաճախորդների հետ թյուրըմբռնումներից խուսափելու համար` գտեք գործընկերոջ, որը կկարողանա Ձեզ խորհրդատվություն տրամադրել:

17. Խորշ մարքեթինգը զանգվածային մարքեթինգից նպատակահարմար ու արդյունավետ է: Խորշ մարքեթինգի թիրախ են հանդիսանում ստեղծարար ու մշակութային հատվածներում տեղակայված փոքր ձեռնարկությունները: Ավելի դյուրին է իշխել փոքր շուկայում, քան փորձել վաճառքն իրականացնել մի քանի տարբեր շուկաներում: Արդեն նշվել է, որ չկա զանգվածային շուկա, այլ կա խորշերի զանգված:

18. Գնորդների շահերը: Գնորդներն այլ կերպ են տեսնում մեր առաջարկած ապրանքները: Նրանց ոչ թե հետաքրքրում է, թե մենք ինչ ենք մտածում մեր ձեռնարկությունների կամ ապրանքների մասին, այլ այն, թե ինչ կշահեն նրանք մեր առաջարկած ապրանքները ձեռք բերելիս: Այդ իսկ պատճառով մենք պետք է ջանանք հասկանալ, թե որոնք են գնորդների արժեքները, որոնց թվին կարող են պատկանել այնպիսի ոչ նյութական երևույթներ, ինչպիսիք են վարկանիշը, համայնքը կամ դրական զգացողությունները: Այդ իսկ պատճառով, մեր մարքեթինգային հաղորդակցման ուղերձներում մենք կարող ենք ընդգծել նման առավելությունները:

19. Գնագոյացում: Մարքեթինգը կարող է նպաստել գների և եկամուտների աճին, հատկապես, երբ տվյալ արտադրանքը կամ ծառայությունը իշխում է խորշային շուկայում: Մենք կարող ենք գները բարձրացնել նաև այն դեպքում, երբ արդեն ավելի լավ ենք հասկանում, թե ինչ են շահում մեր հաճախորդները: 

20. Մարքեթինգը բոլորիս պատասխանատվությունն է: Այն չի սահմանափակվում միայն մարքեթինգի բաժնի աշխատանքով: Այն ենթադրում է բիզնեսի համապատասխանեցումը ընտրված շուկայի հատվածների փոփոխվող պահանջներին: Այդ իսկ պատճառով, ձեռնարկության ցանկացած աշխատող ներգրավված է մարքեթինգային գործընթացում: