Həqiqi və ya əsl kommunikasiya dəyərlərə əsaslanmalıdır. Dəyərlər təşəbbüs, layihə və ya təşkilatınızın varlığının və işlərinin əsaslandığı prinsiplərdir. İstənilən kommunikasiya təşkilatınızı nəzərdə tutduğunuz missiyanı yerinə yetirməyə yaxınlaşdırmalıdır. Missiya dəyərlər sisteminə əsaslanır. Müştəri nə üçün sizin ideyanızı təmənnasız hər yerdə hamıya danışmağa könüllü olacaq qədər dəstəkləyir? Çünki, siz sadəcə müştərinizin ehtiyaclarını, məsələn, musiqi tələblərini ödəmirsiniz (caz festivalı misalı üzərində şərh etməyə davam etsək). Əgər ehtiyacların ödənilməsi ilə kifayətlənsəniz, hədəf auditoriyanız adi müştərilər səviyyəsində qalacaq. Məsələn, tutaq ki, mənə ad günü üçün çiçək lazımdır. Ehtiyac baxımından mənə sadəcə çox da bahalı olmayan gözəl və tər çiçəklər lazımdır. Ancaq sadə ehtiyaclar səviyyəsini aşsaq, mənə sadəcə çiçək lazım deyil, kimyəvi maddələr olmadan və ya az olması şərti ilə yetişdirilmiş, uşaq əməyindən istifadə edilmədən toplanmış və minimum karbon ifrazı ilə satılan çiçəklər lazımdır. Əgər bu şərtləri ödəyən şirkət tapsam, yalnız müştərisi deyil, pərəstişkarı olacağam. Çünki, mənim dəyərlər sistemim həmin şirkətin dəyərlər sistemi ilə üst-üstə düşür. Beləliklə, kommunikasiyanın son mərhələsinə çatmaq üçün öz dəyərlər sisteminizi hədəf auditoriyanızın dəyərlər sistemi ilə birləşdirməlisiniz.

Eyni zamanda bütün mərhələlərdə kommunikasiyanın müvəffəqiyyət qazanmasına nail olmaq üçün etibar formalaşdırmalısınız. Hədəf auditoriyanız sizə olan etibarını itirən kimi kommunikasiya dövrəsindən çıxacaq və sizi tərk edəcək. Belə olan halda bu etibarı bərpa etmək üçün böyük səy göstərməlisiniz. Hədəf auditoriyanın gözləntilərini qarşılamamaya bilməzsiniz. Buna, təbii ki, nail ola bilərsiniz və bu, çox adi haldır. Ancaq qısamüddətlidir. Auditoriyanızla uzunmüddətli əlaqələr yaratmaq üçün həqiqəti deməli, onun ümidlərini doğrultmalı və manipulyasiya etməməlisiniz. Kommunikasiya terrorizm demək deyil. Tərəfdaş və ya müştərinizi nə isə etməyə məcbur edə bilməzsiniz. O, sizin istədiyinizi könüllü olaraq etməlidir. Niyə? Çünki, ona nə lazım olduğunu yalnız siz bilirsiniz və yalnız siz təmin edə bilərsiniz. Və çünki, siz onunla eyni dəyərlər sistemi əsasında yaşayırsınız. Bütün bunlar yalnız dəyərlər və etibar formalaşdırmaq əsasında mümkün olur.

İndi aşağıdakını yadda saxlamalıyıq:

- Həqiqi kommunikasiya dəyərlərə əsaslanır və etibar formalaşdırmaq məqsədi daşıyır.

Sağ olun, görüşənədək! Gələn dəfə kommunikasiya prosesinin əsas elementləri haqqında danışacağıq.