1-ci addım. Strategiyaya riayət edin.

Rəqəmsal strategiya auditoriyanıza çatmaq və müvafiq hədəflərə (məsələn, Facebook, Instagram, Youtube, Linkedin, Twitter və s.) nail olmaq üçün bütün lazımi məlumatlarla sizi təmin etmişdir.

Bundan əlavə, siz kadr və maliyyə resurslarınız haqqında düşünməlisiniz. Sosial media sahəsində fəaliyyət göstərmək tam ştatlı işdir. Böyük təşkilatların rəqəmsal şöbələrində onlarla əməkdaş çalışır. Kadr və ya maliyyə çatışmazlığı problemi yaşayırsınızsa, rəqəmsal hesabların (məsələn, bəzi şablonlara riayət edən stajorlar) aparılması üçün digər kreativ üsullardan istifadə edə bilərsiniz.    

2-ci addım. Plan hazırlayın.

Növbəti addım həftəlik planların işlənib hazırlanmasından ibarətdir. Bu videonun aşağısında həftəlik planın nümunəsini tapa bilərsiniz. Gündəlik olaraq siz əsas mesajlarınızı əks etdirən 3-4 paylaşım edə bilərsiniz. Ümumi qayda ondan ibarətdir ki, paylaşımların hər biri yığcam olmalı və şəkil/video ilə müşayiət olunmalıdır. İlk növbədə, siz mövcud məzmundan istifadənin mümkün olub-olmadığını, mövcud məzmun əsasında bir məzmun hazırlayacağınızı və ya tamamilə yeni bir məzmun yaradacağınızı və bu işi necə həyata keçirəcəyinizi qərarlaşdırmalısınız. Şəkilləri hansı mənbədən götürməli olduğunuzu müəyyən etməlisiniz.

3-cü addım. 75/25 qaydasından istifadə edin

Təşkilatınız ilə bağlı istənilən məlumatı (xəbərlər, fəaliyyətə çağırışlar) təqdim edərkən auditoriyanız üçün aktual xarakter daşıyan mövzu haqqında 3 mesaj paylaşmalısınız (əyləncəli və ya praktik məlumatlar). Paylaşımların ən məşhur tiplərinə aid nümunələrə nəzər salaq: siyahılar (Beş ən məşhur ...), tövsiyələr (Necə etməli...), müqayisə, intriqa, səhvlər, ... haqqında bilməli olduğunuz hər şey, rekord rəqəmlər, sosial baxımdan əhəmiyyətli məsələlər, tanınmışlar, xəbərlər, təhsil. 

4-cü addım. Məzmunun aktual xarakter daşımasını təmin edin

Hər şeyi hər kəsə təqdim etməyə çalışmayın. Məzmununuzu hər bir hədəf auditoriyasına uyğunlaşdırın. Təşkilatınızın nailiyyətlərinə həsr olunmuş xəbərlər tərəfdaşlarınız üçün aktual xarakter daşıyacaq və ya uşaqlar üçün yeni proqramınız ailələr tərəfindən maraqla qarşılanacaq. 

5-ci addım. İcmanız ilə qarşılıqlı əlaqədə olun

Şərhləri cavablandırın, suallar verin, ictimai rəy sorğuları keçirin və müsabiqələr təşkil edin. Əsas şərt ünsiyyətcil olmaqdır. 

Təkcə məlumatları yaymaqla kifayətlənməyin, həm də izləyicilərinizlə dialoq qurun. Məlumatlar ötürülür, ünsiyyət qurulur. Auditoriyanızın ehtiyaclarını dərk edin və onların həyatını asanlaşdıran xidmətləri təmin etməyə çalışın. Məsələyə həssas yanaşın. Eyni zamanda, mənfi rəylərə cavab verməyin qaydasını müəyyən edin. Əsas taktikalardan biri emosional söhbətlər zamanı söhbəti bitirməkdir. 

6-cı addım. "Bu gün" qaydasına əməl edin

İnsanlar ənənələri sevir. Auditoriyanızı paylaşımlarınızı gözləməyə sövq edin. Məsələn, bazar ertəsi günü siz vakansiyalar haqqında paylaşım edə, cümə günü isə diqqət cəlb edən bir neçə şəkil paylaşa bilərsiniz.

7-ci addım. Mövzularınızın təşviqi üçün xüsusi günlərdən istifadə edin

Bayramları və ya xüsusi günləri nəzərə alın və onların aktuallığını mövzunuz (məsələn, Beynəlxalq Muzeylər Günü) ilə əlaqələndirin. 

8-ci addım. Tərəfdaşları, ictimai rəyi formalaşdıran liderləri və  əməkdaşları sosial mediaya cəlb edin

Auditoriyanı genişləndirmək üçün digər bloqqerlərin və ya təşkilatların dəstəyinə ehtiyacınız var. Mümkün tərəfdaşların və ictimai rəyi formalaşdıran liderlərin siyahısını tərtib edin və bir-biriniz üçün necə faydalı ola biləcəyiniz haqqında düşünün. 

İnsanlar başqaları ilə ünsiyyət qurmağa üstünlük verdiyindən gerçək insanların hesabları daha etibarlıdır və markaların hesabları ilə müqayisədə daha çox izləyici sayına malikdir. Bu səbəbdən işçi heyətinizi təşkilatınızı təşviq etməyə həvəsləndirin. 

9-cu addım. Onlayn və real fəaliyyətləri birləşdirin

Onlayn vasitələr kommunikasiya sahəsindəki cəhdlərinizin tərkib hissəsidir. Şəxsi əlaqələr və ya ictimai tədbirlər auditoriyanıza çatmaqda və onu genişləndirməkdə sizə yardımçı ola bilər. Facebookdan və ya digər sosial şəbəkələrdən olan pərəstişkarlarınızla tanış olmaq üçün şəbəkə və ya klub yaradın. Xüsusi mənfəət qazandırmaq üçün əlavə, faydalı təlim və ya fəaliyyət təşkil etməyə çalışın.  

10-cu addım. İnsanların real hekayələrindən istifadə edin

İnsanlar hər zaman başqalarının həyatı ilə maraqlanır. Onlara hadisələr haqqında hesabat təqdim etmək əvəzinə hekayələr danışın və texniki dildən və ya abreviaturalardan istifadə etməkdən çəkinin.